Intatheli: Sthembiso Ngobese
UMQEQESHI we-Orlando Pirates, u-Adeslam Ouaddou, uthi uhlabeke umxhwele ngebhola elinenkosi phakathi elikhonjiswe ngabadlali bakhe abasha abasanda kujoyina eZimnyama kusizini ka-2026/27.
U-Ouaddou odabuka eMorocco, ukusho lokhu ngemuva kokuba iPirates izibekisele indawo emdlalweni wamanqamu womqhudelwano weMTN 8.
Kanti leli qembu lase-Orlando likwenze lokhu ngokuguqisa emdlalweni wamaSemi-final iSekhukhune United ngo 3-0 e-Orlando Sports Arena, eSoweto, ngoMgqibelo.
Amagoli eBucs kulo mdlalo abekwe enethini nguThabang Mokobodi, uGhampani Lungu noKamogelo Sebelebele. Uma sekuhlanganiswe imilenze yomibili, ezikaMagebhula zinqobe ngo 4-0 kwazise phela emdlalweni womlenze wokuqala owawuse-Old Peter Mokaba Stadium, ePolokwane zanqoba ngo 1-0 wegoli likaDeon Hotto waseNamibia.
Ukufinyelela kwePirates emdlalweni wamanqamu weMTN 8 kuyenze yaqopha omunye umlando kabusha ngokudlala kule midlalo iminyaka emihlanu kulandelana. Kanti futhi isivele isizibhalele omunye umlando ngokuba yiqembu lokuqala kuPremier Soccer League (PSL) ukunqoba le ndebe yeMTN 8 amahlandla amane kulandelana.
Ekhuluma nabezindaba ngemuva komdlalo, u-Ouaddou uthe, ujabule kakhulu ngezinga eliphezulu elikhonjiswe ngabadlali bakhe ikakhulukazi laba abasha. Uqhube wathi ibinzima kakhulu imidlalo yabo abayidlale neSekhukhune kuhlanganisa noweLigi kodwa uyajabula ukuthi ekugcineni banqobile futhi bakwazi ukuzibekisela indawo kufayineli yeMTN 8.
“Ngingasho ngithi, le midlalo esiyidlale neSekhukhune ibinzima kakhulu kwazise siyiqembu (iSekhukhune) eliqinile futhi elinabadlali abaseqophelweni eliphezulu kakhulu. Kodwa siyajabula kakhulu njengeqembu lePirates ukuthi ekugcineni sikwazile ukuphinde sizibekisele indawo emdlalweni wamanqamu.
Okunye futhi okungihlabe umxhwele, kube yizinga labadlali bethu abasha abalikhombisile kulo mdlalo. Lokhu kuyinto enhle kakhulu lapha eqenjini ngoba kukhombisa ngokusobala ukuthi ngeke sibe nenkinga kakhulu uma kulimele abanye abadlali bethu abamqoka,” usho kanje u-Ouaddou.
Phakathi kwabadlali abasha abageze igilo u-Ouaddou, singabala kubo uLungu, uMokobodi, uMthetheleli Mthiyane, uSbangani Zulu noMpho Phadime ukubala nje abambalwa.
Lo mqeqeshi, uphethe ngokuthi Ngizoqhubeka futhi nokulokhu ngibanikeza ithuba kweminye imidlalo yethu elandelayo ukuze nokuzethemba kwabo kuzonyuka umdlalo nomdlalo.
“Kumele sisebenzise bonke abadlali bethu abakhona kwazise ukuthi kule sizini sizokuba nemidlalo eminingi okuhlanganisa neyeCaf Champions League okuyiyona esiyibheke kakhulu.”
Emdlalweni wamanqamu weMTN8, iPirates isizobhekana neMamelodi Sundowns, emdlalweni ozokuba mhla zili-10 kuMfumfu (October) eMoses Mabhida Stadium, lapha eThekwini.
